السّلام عليكم،
بربّي سامحوني، في التدوينة هاذي باش نوجّه رسالة مفتوحة للأخت العزيزة عبرات ونقدّم فيها مجموعة من الملاحظات اللّي نراها ضرورية في الظرف الرّاهن. يقول القايل علاش الملاحظات هاذومة ما وجّهتهمش كما جرت العادة بالبريد الإلكتروني أو وسائل أخرى. السبب بسيط وهو رغبتي في أنّ القرّاء الكرام يطّلعوا على بعض تفاصيل موقفي من حكاية التصنيف اللّي صار عليها أخذ وردّ كبيرين في حين أنّو القليلين ناقشو مختلف الأفكار والتدوينات اللي تكتبت في المدونة هاذي وما عندهاش بالضرورة علاقة بالتصنيف.
بربّي سامحوني، في التدوينة هاذي باش نوجّه رسالة مفتوحة للأخت العزيزة عبرات ونقدّم فيها مجموعة من الملاحظات اللّي نراها ضرورية في الظرف الرّاهن. يقول القايل علاش الملاحظات هاذومة ما وجّهتهمش كما جرت العادة بالبريد الإلكتروني أو وسائل أخرى. السبب بسيط وهو رغبتي في أنّ القرّاء الكرام يطّلعوا على بعض تفاصيل موقفي من حكاية التصنيف اللّي صار عليها أخذ وردّ كبيرين في حين أنّو القليلين ناقشو مختلف الأفكار والتدوينات اللي تكتبت في المدونة هاذي وما عندهاش بالضرورة علاقة بالتصنيف.
أختي العزيزة عبرات،
أعتقد أنّو علاقة الصداقة بيناتنا متينة وأخوية وعندها سنين. وإنت تعرفني مليح وتعرف طبيعة مواقفي وطريقة تفكيري باعتبار السنين اللّي عدّيناها مع بعضنا. تتفكر وقت اللّي عرضت علي مشروع المدونة قتلك اللّي [المثالية المفرطة] متاعك -اللّي ترعرعت في تربة عربية وأزهرت في تربة غربية- جعلتك ترتكب خطأ إستراتيجي باش يساهم في التشويش على الأهداف الحقيقية للمدونة. أوّل مرة شفت التصنيف قتلك "عبرات، شيء ماكش باش تتخلص من النظرة المثالية برشة اللي تحب تحققها في واقع لا يَحتمل وغير مهيأ عمليا لهكذا تصورات؟". ضحكت و قتلي "الحلم موش عيب وطريق الألف ميل تبدأ بخطوة". قتلك "فمّة فرق ما بين خطوة في أرض رملية وخطوة في أرض سهلة وخطوة في أرض الكلّها ألغام وين مع كل خطوة تقول زعمة هاذي لخّرة!"
وتكلمنا وقتها وناقشنا برشة حاجات. بالطبيعة إنت أكثر الناس اللي يعرفو موقفي من المدونات هاذي والأفكار اللي يروّجو فيها وتتفكر مليح كيف سألتني على رأيي قتلك أنو شخصيا ما عدى زوز مدونات ظاهر اللي أصحابها ناقصين شوية إطّلاع ويلزمهم المزيد من الخدمة فالبقية ما نرضاش باش نصنّفهم في القسم العاشر للبهامة. ورغم ذلك قتلك ما كانش من الحكمة أنك تنشر التصنيف هذاكة لأسباب عديدة. هاو باش نستعرضلك بعجالة ربط ما بين الأسباب اللي قتلك عليهم وقتها واللي صار فعلا. بالطبيعة ما كانش ممكن في الوقت هذاكة أنك تتراجع خصوصا وأنو خبر التصنيف انتشر كيف النار في الهشيم واسمع يا اللي ما تسمعشي هاو فمة مدونة تصنّف وتتهم بالغباء والعمالة وغيرو. آنا عرضت عليك أنّك ما تجاوبش على التصنيف. قتلي "آنا عطيت وعد وولاّت المصداقية متاعنا في الميزان وموش مسموحلي باش نلعب بيها". قتلك "أعمل بروفيل با" قتلي "بروفيل با معناها باش نتراجع ونتراجع معناها القارئ باش يفهم اللي آنا اعترفت بخطأ وبناء عليه يلزمني نعتذر... هاذا أشنوة الأصول تقتضي. في حين أنّي نعتبر أنو من حقي باش نعبّر على اتفاقي أو اختلافي مع أيّ كان". قتلك "أمامك حل واحد: تواجه العاصفة البدائية اللّي موش باش ترحمك حتى طرف". قتلي "آنا مقدّرة الموقف ونتفق معاك أنو ربما تسرّعت لكن هاذا ما يمنعش أني باش نتحمل مسؤولية رأيي وإنْ دُفعت لمواجهة أيّ كان، ناو بروبلم". قتلك "أوكي، آما حط في بالك اللّي المواجهة هاذي باش تكون كل شيء ما عدا أنّي تكون فكرية". إنت أكثر الناس اللّي تعرف اللّي آنا قتلك لكلام هاذا موش خوف ولا رهبة وظاهرلي تتفكّر عليسة في مواجهات فكرية وجه لوجه وعشرة مرات أعنف ملّلي موجود في البلوغوسفير. هاذيكة كانت مواجهات حافظت على مستوى معين وما هبطتش لحد السباب الجنسي المقذع. لكن اليوم شوف المستوى اللي وصلّو الحوار. أحيانا الحكمة تقتضي التراجع خصوصا كيف يكون الخصم محكوم بعقلية القطيع ويمشي بمبدأ "انصر أخاك ظالما أو مظلوما" بالطبيعة دون أن يولي اهتمام لمعنى ظالم أو مظلوم، ويتصرّف على أساس اوقف معاي اليوم تلقاني غدوة والمتسلّفة مردودة.
أوّل خطأ هو أنك كنت تتصوّر في الناس اللّي صنّفتهم وحتى البعض من لخرين واللّي حسب رايك عندهم مستوى معرفي محترم، باش يتقبلو بصدر رحب أي نقد يتوجهلهم. رؤيتك المثالية للأشياء خلاّتك تعتقد أنو أي شخص يرفع شعار بالضرورة يلتزم بيه خاطرك إنت تعلّمت تلتزم باللي تقولو. في حين أنو التجربة أثبتت عدم صحة هكذا إسقاطات في مجتمعات شرقية مكبوتة، عنيفة وتعاني قصور رهيب في ثقافتها وتكوينها الإجتماعي. الرؤى متاعك واللي بلسانك عطيتني برشة أمثلة تثبتها، موجودة تقريبا حصريا، في مجتمعات غربية نجحت رغم الآلة الليبرالية المتوحشة واللوبيات التي لا تشبع في إرساء دعائم مجتمعات تقبل نسبيا الاختلاف والنقد وأنشأت أنظمة تعليمية وثقافية قادرة على تربية الشخص وتوعيتو أنو ماهواش عايش وحدو في البلاد وفمة ناس أخرين معاه وبالتالي فمة قواعد يلزم الناس الكل تحترمها باش ينجموا يعيشو من غير مشاكل. والقواعد هاذي مجعولة لتحقيق الحرية والمساواة والعدالة للجميع.
الخطأ الثاني هو كيف إعتبرت أنّو الناس هاذوما عندهم نفس الدقة والمنهجية متاعك بحيث تقرى النصوص بدقة وما تستشهد بحاجة كان كيف يبدا عندك الدليل وهاذا شيء موش غريب على شخص بالتجربة الأكاديمية والعلمية متاعك. لكن التصوّر هاذا يسقط كيف يواجه ناس تحمل أفكار مسبقة أو/و نزعة عاطفية في التعامل مع الأشياء أو/و ما أسوأ وهو الإنطلاق من استنتاج والبحث عن تفسير له في النص عوض إعتماد الإتجاه المعاكس. وفمة برشة أمثلة منهم على سبيل المثال، تفسير مصطلح الغباء واللّي إنت فسّرتو وحللتو وبرّرتو وحتى حد ما عطا قيمة لكلامك بل الناس الكل تقريبا إعتبروه شتيمة موجهة لشخص المدونين واللّي هو بالطبيعة كلام عاري من الصحة. بالطبيعة الناس هاذومة عمرهم ما برّروا العبارات من قبيل "بهامة"، "غباء"، "خوانجي" وحتى عبارات أكثر صفاقة هاجمو بيها بلاد كاملة بتاريخها وناسها وأرضها وشهدائها اللّي قاومو المستعمر باش اليوم يجي من أحفادهم أشكون يطلق على تونس ألفاظ من قبيل "جربوعستان" و"حمقستان"! بالطبيعة من غير ما نتكلمو على سذاجة البعض اللّي على ما يبدو، يعشق برشة إذاعة "قالوا" وينطلق من أخبارها باش يؤلّف ويأوّل وينفخ في فزّاعات وهمية للتضليل وإعطاء أبعاد غير صحيحة للمشكل الحقيقي، فواحد قلّك إنتوما خوانجية وبعد قلّك انتوما تمارسو في الوصاية على القارئ ولاخر قلّك إنتوما تقومو باستفزاز مجاني وتستاهلو اللّي صارلكم وهات من هاك اللاوي.
الأسباب هاذي هي اللي خلاتني نطلب منك سابقا باش متجاوبش لأني نعرف عن تجربة، نوعية العقول اللي على الطرف الآخر ولأني نعرف اللي الناس هاذوما في مجملهم قيمهم الأخلاقية غير سليمة والدليل إلتجاءهم للسباب الجنسي ضد إناث. هاذا مردّوا أنو في مجتمع ذكوري، المرأة لا يمكن إلا أنو تكون عورة وآلة تفريخ (بالنسبة لأصحاب العمائم وأتباعهم) أو أكسسوار جنسي ومتاع للتباهي أمام الأصدقاء وقضاء الليالي الحمراء (بالنسبة للإلحاديين السذج -حقوق التأليف للمدون طارق- والعلمانيين بوخمسة ملاليم). يعني في كل الحالات المرأة لا يمكن أن تكون سوى وسيلة شهوة لا أكثر ويعتقد الرجل أنو الجنس هو وسيلة السيطرة عليها وإهانتها. لذلك تشوف أنو الراجل ما يسبّ المرا كان بمعجم الفعل الجنسي المباشر. شوف كذلك كيفاش الطرف المقابل يحاول يشكك في أنّو القائم أو القائمين على المدونة هاذي في الحقيقة راجل ولاّ مجموعة رجال! هاذا شيء موش إعتباطي لسببين أوّلهم أنو الرجل الشرقي لا يتقبل عموما فكرة أنّو مرا تعاندو في أفكارو فما بالك تنعتو بالغباء وتكتب نصوص في السياسة والإعلام وغيرها -واللّي هي ميادين عموما رجالية- وثانيهم للتقليل من أهمية السباب الجنسي باعتبار أنو الرجال ما بيناتهم متعودين على تبادلو لأتفه الأسباب. بالطبيعة نظرة كيف هاذي تسبب الغثيان وتؤلم لكن هاذاكة هو الواقع اللّي تعاملت معاه أختي العزيزة بمثالية وتجرّد في تقديري، زايدين عن الحدّ المعقول.
وكيف تحلل خطاب الناس هاذومة واللّي ما تناولش ولو بشكل عابر أي فكرة مركزية لكن ركّز على التهم وتلصيق الإيتيكات من نوع "التخونيج"، "الفاشية"، "أقلام صفراء ودعائية" وخلافو. في حين حيّد تماما أيّ نقاش في صلب الموضوع حتى لمجرّد الإحراج. وتلاحظ بالطبيعة أنو كل الأصوات سواء المعنية بشكل مباشر أو اللي قدمت نفسها على أنها أقلام معتدلة (ما عدى ولادة اللي سبق ووضحت موقفها) وفجأة أصبحت الأصوات هاذي هي اللي تقود في الهجوم قال اشنوة مريضة وتعدّيت على حرية الآخرين وتمارس في الوصاية على عقول القرّاء ومتصنفليش مدونتي حتى في خانة شقيق أو صديق وأشياء أخرى مضحكة. كيف تتأمل ردود الفعل تلقى خطاب واحد: مثلا واحد قال "تخونيج علمي"، لاخر قال "الخوانجية يفسدو كل شيء"، الثالث قال "تنعتو فينا بالاسلاموفوبيا وهي تعبير ملطّف للتكفير" ومنعرفش منين جاب كلام بهالخطورة، واحد قال "فاشية" ولاخر قال "محاكم تفتيش" والثالث قال "محاكمة نوايا"، واحد قال "برافدا" والثاني قال "تنبير" والثالث قال "دعاية"، إلخ. فقط توقّف شوية عند تهمة "التخونيج" اللي استعملوها كتشويه متعمّد وسهل خصوصا أنّو الناس تخاف من المصطلح هاذا بالذات. الشيء هاذا يذكرني بربط المسلمين بالإرهاب في الغرب لأغراض دعائية.
أختي العزيزة عبرات،
أعتقد أنو هكذا تجارب مفيدة للغاية إذا عرفنا نستخلصو منها أفضل الدروس. هاو توّة ولات عندك فكرة على الفضاء اللّي قاعدة تكتب وتستعرض فيه أفكارك. النهار اللّي تناقشت فيه معاك ومع أختنا تانيت على المشاركة في هالمشروع تفاهمنا على أهداف يلزم كل واحد منّا يسعى لتحقيقها من جانبه. ها العاصفة البيزنطية عطّلت كل أهداف المدونة وشتّت المجهود في صراعات جانبية لا معنى لها مقارنة بالهدف الأصلي. وهاذا كان له خسائر ونتائج سيئة. مثلا آنا شخصيا كان عندي برشة تدوينات وتعليقات حول مواضيع أصبحت الآن غير قابلة للإستهلاك خاطر إنتظارنا لتصفية الصّراع هو اللّي كان سبب في نهاية صلوحيتها. أعتقد أنو حان الوقت للتفكير بجدية في المرحلة القادمة والقيام بتقييم موضوعي وجدّي للموقف. وإذا اقتضى الأمر التراجع عن بعض المواقف أو تعديل المسار للتقدم بشكل أفضل فلا بأس. لابد من النقد الذاتي وعدم إغلاق الباب أمام فرضيّة التغيير. ويلزم تتفكر ديما اللّي ولحد الآن التجربة التحريرية ناجحة في تقديري، لأنو الخروج بمثل هذا التناغم والتكامل في النصوص أمر صعب رغم أنّو أحيانا توصل بينا الإختلافات إلى طريق مسدود.
مع كل حبّي واحترامي وتقديري،المخلصة علّيسة
الحقيقة ما نراش أنو من مشمولاتي التدخل في الخط التحريري لأي مدونة بما في ذلك مدونتكم.. لكن بما أنكم عبرتم على اختلافكم في موضوع "التصنيف" بشكل علني و مباشر فإني نعتبر إلي الطرح إلي عبرت عليه المدونة "عليسة" في مكانو... لأنو مثلما لمجت في تعليق سابق في المدونة هذية الحرص إلي أبديتوه على الدفاع عن "الموضوعية" و "المنهج العلمي" ما ينجمش يتلاءم مع وصف مدونات معينة بأنها في المطلق "غبية"... نقول هذا بالرغم من تفهمي لانفعالكم من مضمون بعض المدونات و ربما مساندة مدونات أخرى ليها... و هذا عبرت عليه بوضوح في تدويناتي المدة الفارطة... في رأيي أنو حتى لو استعمل البعض مصطلح "الغباء" أو غيره بشكل تعميمي فإنو ردة الفعل إلي تحب تحقق "الموضوعية" ما تقعش في نفس النهج التعميمي... و المهم مش في الخطأ و لكن في التعلم من الاخطاء... و مراجعة الموضوع هذا نتصور بش يتحسب ليكم مش عليكم...
حظ سعيد وبالتوفيق انشاء الله
وَأمّا ما ينفع الناس فيمكث في الاَرض
على عكس طارق انا نتفهم التصنيف ونحذو حذو الاخت عبرات
إستوقفتني هده الجملة:
"ها العاصفة البيزنطية عطّلت كل أهداف المدونة وشتّت المجهود في صراعات جانبية لا معنى لها مقارنة بالهدف الأصلي. وهاذا كان له خسائر ونتائج سيئة."
لا بالعكس... هالعاصفة البيزنطية كانت تجربة تطبيقية مكـــنت من كشف الكثير.
مكنت من كشف الجو المشحون بالإحتقان و التخندق السلبي و الرياء و النفاق المدوناتي... بمنطق " إنت معانا و لا معاهم ؟"...
الكثيرون كانت ردة فعلهم بمنطق "نصرة الصديق" و التخندق في صفه مهما كان الثمن... و لم تكن بمنطق مناقشة موضوع التصنيف بشكل نظري و عام و مجرد..أي ان الكثيرين سقوطوا في فخ الشخصنة و فخ الحسابات الضيقة..
هذه المدونة أثرت مجتمع المدونات التونسية... و لا أظن أن من يتعرض لمواضيع شائكة كالتي تتعرضون لها في هذه المدونة, ينتظر من الناس ان ترمي له الورود..
أن تقوموا بتعديل بعض الخطوط الشكلية في المدونة ( التصنيف مثلا) لن يعتبر أمرا سلبيا... و لا أظن انه تراجع ...
أن تحافظوا على التصنيف.. ليس بالمجازفة أيضا... بل هو حق من حقوقكن يندرج في إطار حرية التعبير.
أنتن امام خياران ... كلاهما لن ينقص من ثراء هذه المدونة و أهدافها البناءة
عمروش يظهرلي من المهم هنا توضيح سبب الدفاع عن هذا الموقف أو على عكسو و عدم الاكتفاء بمساندة موقف من دون تقديم الأسباب.. يظهرلي النقطة المثيرة للانتباه أنو في رايي بعض المدونات المصنفة مش ممكن وصفها بكلها و كل ما تنتجو بأنو غبي... لكن صحيح في حالات أخرى ما نجمش للأسف نختلف مع الوصف هذا.. و برغم هذاكة فإنو وصف إطلاقي من النوع هذا من المفروض يتعطى على رأي أو تدوينة أو موقف محدد مش على مدونة كاملة بكل جملها و حروفها... حتى من الناحية العملية فإنو إطلاق وصف من النوع هذا يتطلب برهنة و البرهنة مش ممكنة على وصف من النوع هذا في علاقة بكامل تدوينات أي مدونة
البعض يستعمل في أسلوب شعبوي في مواجهة مواقف معينة... لكن الرد على المدونات هذية يكون أنجع بأنو يتجاوز الأسلوب الشعبوي متاع التعميم إلي يسقط فيه البعض.. و أنا حسبما فهمت من المبادئ المعلنة للمدونات القايمين على المدونة هذية أنهم يحبو يدافعو على مواقفهم من خلال مناهج موضوعية و علمية و هذا صار في عدد من التدوينات كنت علقت على بعضها... و يظهرلي موضوع التصنيف الاطلاقي حتى على مدونات مش مدونين يتعارض مع الأسلوب هذا
لكن نتفق مع تعليق فر ي رايس إلي الخوماضة هذية ورات أنو "الصحبة الافتراضية" أهم من المواقف المبدئية.. الغريب في الأمر إلي هذية "صحب ديجيتال" و أحيانا البعض يتجنب الموضوع برمته خوفا على اسم افتراضي مش حتى اسمو الواقعي.. يظهرلي بعض الناس ماخذين بجدية أكبر من اللازم هويتهم الافتراضية لدرجة تخليهم سجناء لصور وهمية تكونت عبر مدوناتهم...
هاو باش نحكي معاكم بصراحة، و نحاول نلخص نظرتي الماكسيموم. آنا نعتي بغبي ما قلقنيش، و حرية التصنيف حرية تعبير عندي، كيف كيف نرمال، و كان تركزوا أموركم و تقراو إجابتي الوحيدة "إجابة على تساؤلات عبرات" تو تشوفوا لي حكاية التصنيف و الغباء ما جاتش على لساني، بالعكس خذيت وقتي و جاوبت على كل سؤال. مشكلة المدونة مشكلة أخرى، شوف انتي شقلت: "ومنعرفش منين جاب كلام بهالخطورة، واحد قال "فاشية" ولاخر قال "محاكم تفتيش" والثالث قال "محاكمة نوايا"، واحد قال "برافدا" والثاني قال "تنبير" والثالث قال "دعاية"، إلخ."... معناها تتجرّؤوا تبهتوا من ردود فعل هكّة بعد ما في عنوان المدونة برك (مانيش باش نهبط لخرم التدوينات) تقولوا: " محاولة لإصلاح ما أفسده جيش من المتواطئين والمناصرين للعدو ضد وجود ومستقبل شعوبنا " و "هنا نفضح فقط من يتآمر ويتلاعب بوعي شعوبنا".. انتوما مدونتكم من أولها تبنات على كلمات كيف خيانة و عدو و تآمر، كيفاش تتشكّاو مبعّد من كلام "بهذه الخطورة"، بالعكس، صدقوني، ما تتصوروش قداش انجم نهبط لمستوى الحجاج متاعكم (آنا و المدونين الأغبياء الكل) و تشوفوا شمعناها تخوين. باقي نرجعكم لمدونتي، عاودوا اقراو، لاحظوا لي نقدي كان ديما موجه للفكر الإسلامي و لأتباعه، و في برشة حالات تعرّضت للمد المخونج لي عايشتّو بلادنا، أما في حتى لحظة، في حتى جملة، ما وصلت قلت "هاذم عباد متآمرة علا مستقبلنا" ولاّ "هاذم أعداء وطن"، تتصوروا لي ما كنتش انجم مثلا نجي نقول لي تيتوف و عمروش و فري رايس متآمرين على سلامة الوطن و خونة لصالح السعودية الوهابية ولّي هوما أبواق العدو ووووو ؟؟؟ بالطبيعة عمري لا فكرت لحظة نعملها خاتر عندي مخ، على عكس كاتبات المدونة هاذي. و بالعكس، طريقتكم في رمي كل أفكارنا في سلة "الآخر" دليل على إرادة إقصاء تحب ترتاح مالتخمام، بالعربي، إذا هوّ خاين و عدو زايد باش نشوف شي حب يقول. باش نعطيكم مثال آخر حي على الفرق بين غبائي و غبائكم، في السونداج لي عملتوه، النتايج تكلمت بنفسها، و العباد أجمعت أنو التونسي و العربي بصفة عامة عايش بينات المطرقة و السندان: الدكتاتورية و الإسلام السياسي. ياخي نتوما دهشتوا، و بديتوا محاولات تبرير للتيارات الإسلامية. لنا آنا كنت انجم نتهمكم بالعداء لتونس، كنت انجم نقول لي نتوما تحبّوا تجيبوا موديل مجتمع مش متاعنا لذا نتوما خونة، أما لاااااا، نعرف لي نتوما على حسن نية، نعرف لي نتوما تشوفوا أنكم على صواب، أما آنا مانيش موافقكم، واكاهو. علاش كي ماعناش فرد راي احنا و لخرين نردوهم يحبولنا الشر؟ نفرضوا أني غالط في حساباتي و لي الفكر العياش تخلويض و لي الإسلام هو الحل، هل هذا يجعل مني خائنا و عدوّا ذو سوء نية؟؟؟ و طابور و هيلمان ووو ؟؟؟ خممو فيها بلقدا الحكاية هاذي.
حاجة أخرى، المدونة متاعكم تضحّك برشة بسبب الجدية المفرطة، عاملين أقسام و جداول و جايبين ما عندكم، و عندكم نقص مرضي من روح الدعابة، مثلا كيف تراب بوي يقول جربوعستان تشوفوها طول تحقير الوطن و نجبدوا طول الإستقلال، مخكم الإسلامي ما يتخيلش إمكانيات الفدلكة، و صدقوني، نقص الضحك و الدعابة، هو الغباء الحقيقي.
يا قننّو من المرسى :)
"... أنو التونسي و العربي بصفة عامة عايش بينات المطرقة و السندان: الدكتاتورية و الإسلام السياسي ..."
و غباء اليساريين زادة ما تنساوش بربّي. ياخي شبيكم ما تنتقدو كان الحزب الحاكم و الإسلاميين. و خاصّة أن الإسلاميين في الواقع ما عندهم حتّى تمثيل سياسي في تونس؟!!!
و اليسار بودورو متاعنا، ما جا حتّى شئ، مشتّت كيف أولاد الحجلة، شنوّة قولك فيه؟ زعمة موش فشل اليسار هو سبب مباشر و غير مباشر لعديد من المشاكل السياسية و الإجتماعية في تونس، و أوّلهم التعليم و الثقافة؟
بربّي وقتاش يجي نهار و نسمعوا فيه نقد ذاتي لليسار، عندكشي فكرة؟؟
ممكن تعليقي خارج الموضوع، لكن موش مشكل.
عندك الحق سفيان، اليسار في تونس مشتت و ناقص أفكار. السبب هو أساسا الدكتاتورية، لذا ننقدها هيّا بالأساس. و من خلال نقدي و طرحي لبديل نكون ساهمت في وجهة نظر جديدة ليسار جديد. كان جا اليسار فاعل في المجتمع، نقولو، يولّي نقدو واجب، أما المشكل الّي المجتمع التونسي يعرف في تحول إسلامي، علاش باش نخترع مشكلة ما ثماش و نطيح نسب في اليساريين؟ باقي نفرض لي آنا غالط، علاش مش نتومة تقوموا بنقد للأفكار اليسارية؟ ولاّ برة اهوكا سوكارجي عدو خاين و مش لازم ننقدو؟؟؟؟
شوف يا عياش أول حاجة أنا مانيش إسلامي و سبق و قتلك. و ممكن راني سكّارجي أكثر منّك. على كل حال هاذي أمور شخصيّة.
فيما يخص اليسار، العديد من التحويرات و التدخّلات في التعليم هي من فعل اليسار، و زيد اليساريين مهيمنين على كل ماهو ثقافة في البلاد، لكن لم ينجحوا. و على اليساريين إنتقاد أنفسهم. أنا عندي قناعات يسارية، لكن اليسار التونسي بالنسبة لي هو يسار مغشوش، على كل حال حكايتو فارغة، لكن ما يحبّش يستعرف.
عياش
كان جا اليسار فاعل في المجتمع، نقولو، يولّي نقدو واجب؟؟؟؟
ووزير الرياضة الجديد شنوة؟موش يسار؟تعينو في الوقت هذا موش مغازلة ومد يد؟
ولو فرضنا علاش التيار الاسلامي هو المهيمن زعمة؟ ولذلك نقده واجب
حاول ماتقعش في التناقض
احمد
اي باهي كيف استعرفت انك تعلمت (حاجة برك) من تجربتك خاطر الشيء واضح
عمروش ههههه وزير الرياضة يساري، إي ماو حاشتنا بالعدل الإجتماعي في القفز بالزانة و تحقيق مبادئ الديمقراطية العلمانية في رمي الجلّة. تهنى يا صديقي عمروش أنا لست متناقضا، على الأقل إلى حد الآن، التيار الإسلامي منتشر بسبب فراغ فكري و ثقافي و فلسفي و مرجعي، و هاذي حاجة معروفة مش آنا مخترعها. في العالم الكلو، العرقية و الرجوع إلى الدين جا كرد فعل طبيعي للعولمة الوحشية و الليبرالية على طريقتها الأمريكية زيادة لسقوط جدار برلين. الدكتاتور حامي السياسة منهم بإعطائهم المجتمع، قسمة عادلة. الإسلاميين صعيب برشة يتمثلوا سياسيا في تونس، أما المجتمع هوّا لي قاعد يتحوّل، أما لي يهنّيني هو أنو تحوّل غير جذري، التونسي يتبع في اللموضة، و منذ بضع سنوات جات لموضة عمرو خالد و الخمار و الحديث عن الفتاوي الأخيرة و هذا رد فعل طبيعي كما قلت و موضة ستذهب كاللاتي جئن قبلها..
أخت عليسة،
شكرا لك على صراحتك المتناهية ورجاحة رأيك. فهذا النص يترجم ما عرفته فيك من صراحة وشجاعة وحكمة. وأشكرك كذلك على أنك تفهمت موقفي بشكل جيد.
أنت تعلمين صديقتي أنني منفتحة لكل الآراء. أوافقك الرأي على جل ما ذكرته في رسالتك وأشاركك الرأي أنه من واجبنا أن نقف وقفة محاسبة وتقييم أمام ما قمنا به. بالتأكيد هذا يعزز موقفنا الذي يعلن أننا ما ادعينا يوما إمتلاك الحقيقة.
لدي تصور مبدئي للتغيير ولا أريد أن أطرحه قبل أن أعلم تفاصيل رؤيتك و رؤية أختنا تانيت بهذا الخصوص. وأترك لكما حريه مناقشة هذا هنا أي في العلن أو بالطرق المعتادة.
شكرا لك وفي انتظار ردك.
حبي وإحترامي سيدتي،
عبرات
@طارق، عمروش، فري رايس، عياش، سفيان، أحمد:
شكرا لتدخلكم و تأكدوا أنني سآخذ في الإعتبار كل الآراء.
عبرات... نحب بمعزل على أي شيئ أني نقدر فيكم شجاعتكم في طرح نقاط خلافية بيناتكم بشكل مفتوح
عياش من المرسى... من جملة النقاط إلي ذكرتها فمة حاجة تستوجب التعليق أكثر من غيرها: كقاعدة عامة السخرية في حد ذاتها ما تعطيش حصانة لأي خطاب من أنو يكون عنصري أو اسلاموفوبي أو غير ذلك... هكة يحصل في المجتمعات المتحضرة مش مجتمعات الفوضى و هذا مش بالضرورة يحصل بقوانين (و لو أنو يوصل للدرجة هذيكة في بعض الاحيان).. نعطيك مثال أخير فقط للاشارة الى سيادة القاعدة العامة هذية... توة أيامات نشرت جريدة نيويورك بوست اليمينة ("المتطرفة" أحيانا) كاريكاتور حول مشروع التحفيز الاقتصادي المهم فيه غوريلا و بوليس قتلها... السياق العام متاع الكاريكاتور و المقال إلي تنشر معاها يوحي أنو الغوريلا (الكحلا) هي رمز لأوباما... الشي إلي أدى للتفسير هذا هو أنو وقع استعمال الغوريلا تاريخيا في رسوم الكاريكاتور في امريكا للتوصيف السلبي للسود... المهم تقلبت الدينا الى درجة أنو الجريدة المعروفة أنها ما تعدل على حد قدمت أول مرة في تاريخها اعتذار رسمي... و كيف كيف في نفس السياق رسم "البطيخ" (كيف الغوريلا) رمز تاريخيا في امريكا للسود (ترميز و سخرية من ضحكة السود)... هذا مجرد مثال للاشارة للقاعدة العامة هذية على خاطر هذية يظهرلي المرة الثانية إلي شتك كتبتها...
توة مصطلحات كيف "جربوعستان" و "حمقستان" عندهم طبعا سياقهم الخاص إلي ما يتلاقاش ضرورة مع مثال "الغوريلا" و زيد أنو كل مصطلح حسبما نعرف وقع استخدامو في سياقو الخاص... ما خممتش شخصيا بشكل مركز في الموضوع لكن للاشارة فقط فإنو بالاضافة للبعد التعميمي لمصطلحات كيفما هكة إلي من المتوقع بش يتفهم من قبل برشة ناس توانسة أو مسلمين (حسب المصطلح) أنو مهين ليهم (قاعد نتصور في ردود الافعال العنيفة برشة لو أنو أمريكان وصفو بلادهم بأنها "جربوعستان" أو "حمقستان" بسبب المأزق إلي هزها ليه التيار النيومحافظ على سبيل المثال) و هذا طبيعي و جزء من الطبيعة البشرية... فإنو وضع مفرد "ستان" (المطصلح الفارسي الدال على "الارض" أو اصطلاحا "بلد" حسب تاريخ الاستعمال) أصبح يستعمل في السنوات لخرة بشكل تهكمي في السياق الغربي و الامريكي بشكل خاص على مجالات مسلمة مختلفة في سياق التعميم على منطقة غير معروفة جغرافيا... هل هناك علاقة واعية بالسياق هذا أو غير واعية مانجمش نحدد وفقا للمعطيات إلي نرى فيها توة بشكل متسرع...
شفت كيفاش كلمة فقط ينجم الواحد كيف يحب يتصرف بالحق من موقع المثقف أنو يوزنها بالسياسة أنو يشوفها من برشة زوايا و ما يتسرعش في إصدار أحكام سلبية أو ايجابية... نحس إلي تنجم تكون أرزن ببرشة من الاشياء إلي تكتب فيها في كثير من الاحيان
طارق، نتصورك متأثر بالسيستام الأمريكي و هذا طبيعي، لكن بصراحة أمريكا ماهيش الموديل الوحيد لي انجموا نقيسوا عليه، وقتلّي حكاية تعمل ضجة في بلاد في بلاد أخرى تتعدّى، مثلا الاختلاف في ردود الفعل بين الصحافتان الانقليزية و الفرنسية بعد كاريكاتورات الرسول. و باش نكون معاك صريح، في كل ما يتعلق بالحرية كيف ثمة شك ديما نميل للحل الأكثر حرية، و أمريكا ثقافيا و اجتماعيا لا يجب اعتبارها قدوة في رأيي..
اشبيك تحكى باماريكا يا طارق....عياش قاللك اللى هو مايحبشي اميريكيا...عياش وليد باريز وما يحب كان باريز وماعاد تحكيلو كان على باريز على خاطر سارتر كان يعيش فى باريز...باريز...عرفتها باريز...باريز الشقيقة بالنسبة لعياش...تحياتى والى لقاء....فى باريز
السلام عليكم...
لكل الإخوة والأخوات المعلقين والمعلقات (بالطبيعة موش معلقات بني عبس ههه)
نعتذر وسامحوني كان وخرت عليكم في الرد... والله لاهية برشة هالأيامات رغم اللي عندي برشة حكايات نحب نقولهم (شوفتو ما أكثر حكاياتنا إحنا النسا ما عدى أنو المرة هاذي موش حكايات في الموضة والتصنيف متاع الكوجينة... بل في تصنيف من نوع آخر ههه).
أولا نشكر كل الإخوة اللي تفاعلو مع تدوينتي وفي تعليقي هذا باش نجاوب بسرعة على التعاليق السريعة وفي التعاليق التالية باش نتناول التعاليق الأخرى بأكثر تفاصيل.
طارق: (التعليق لول والثاني)
عالسلامة سي طارق. آنا موافقة معاك.
عمروش:
مرحبا بيك خويا وشكرا لمساندتك وما تبخلش علينا بملاحظاتك
سفيان:
مرحبا بيك خويا وشكرا لإثرائك للحوار.
أحمد:
أولا مرحبا بيك وشكرا على رأيك اللي نحترمو برشة وما نعرفش علاش حذفت تعليقك رغم اللي نعتقد أنو موقف يشاركك فيه برشة ناس وجدير باش يتقال وأني نرد عليه.
على كل حال، خويا إحنا ما عمرنا ما هاجمنا حتى حد من غير سبب وديما نبرر مواقفنا وندعم بأمثلة واضحة وهاذا يعكس رغبة في بناء حوار جدي.
حبيت نقلك اللي إحنا ناس مناش مسيسين وما عنا حتى إنتماء لا يمين ولا يسار ولا فوق ولا لوطة. إحنا ندافع على جملة مبادئ نؤمن بيها و"الخصوم" اتهمونا بتهمة "التخونيج" واللي سبق وعلقت عليها، زورا وبدون دليل وتوة خففو التهمة هاذية للإسلاميزم خاطر عرفو اللي تهمة "التخونيج" ما يصدقها حتى حد. على كل حال، موش مشكل والتهم كيما السباب لكلها داخلة في إطار "الرد لمجرد الرد" موش "الرد للحجاج أو الاقناع" وعلى كل هي ضريبة معقولة.
يقول القايل فاش قام نهاجم في البعض على البلوغوسفير؟ نقلك خويا اللي فمة البعض واللي طلعو برشة موش كعبتين وكعبة كيما كنت نتصور، قاعدة تتبنى في خطاب إسلاموفوبي إستئصالي مقيت لتمرير أفكار ومواقف سواء بشكل مباشر أو غير مباشر, تجد لها مرجعيات خطيرة وتهدد فعلا مستقبل عالمنا العربي بصفة عامة, كالصهيونية و"جمعية أحباء النظام العالمي الجديد" إلخ. الكلام هاذا موش مجرد تخويف. لكلام هاذا عندو ما يبررو وسبق وعطينا أمثلة ومازال فمة أمثلة أخرى في الطريق. شوية صبر برك.
على كل ندعوك بكل لطف للإطلاع على نصوصنا وعلى النصوص اللي هاجمناها وتحاول تحكم عن دراية وعن إطلاع. وحتى وإن بقيت على رأيك لولاني فلا بأس. نحترمو رايك مهما كان وخصوصا كيف يكون مبني على معرفة.
شكرا ليك ومرحبا بيك في مدونتنا.
أبو العربي:
ديمة تشري في الشبوك؟ هههه
مرحبا بيك على كل حال وماذا بينا كان تقعد عاقل وناس ملاح! ههه
خويا فري،
على سلامتك. ونشكرك على تفاعلك.
"لا بالعكس... هالعاصفة البيزنطية كانت تجربة تطبيقية مكـــنت من كشف الكثير.
مكنت من كشف الجو المشحون بالإحتقان و التخندق السلبي و الرياء و النفاق المدوناتي... بمنطق " إنت معانا و لا معاهم ؟"...
الكثيرون كانت ردة فعلهم بمنطق "نصرة الصديق" و التخندق في صفه مهما كان الثمن... و لم تكن بمنطق مناقشة موضوع التصنيف بشكل نظري و عام و مجرد..أي ان الكثيرين سقوطوا في فخ الشخصنة و فخ الحسابات الضيقة.."
لكلام اللي قلتو فيما يخص الاستقطاب والناس اللي تعدي صداقاتها قبل مبادئها الشيء اللي يعبر على نفاق كبير وعلى فساد النهج والمرجع، كنت تكلمت عليه ولخصتو في تدوينتي. صحيح آنا بيدي تفاجئت بنتائج ها "العاصفة" حيث تكشفو مدونات "الإعتدال" على الطريقة العربية ههه وجماعة الفكر البودورو وجماعة المبادئ بثلاث قروش وجماعة الأخلاق "الحميدة". وهاذي نتائج في مجملها ايجابية لأنها باش تحدد الناس اللي تستاهل أنك في المستقبل تناقشها وتتواصل معاها من الناس اللي نقاشك ليهم مضيعة للوقت والجهد.
لكن اللي قصدتو بالنتائج السيئة هو مقارنة مع الهدف الحقيقي للمدونة وهو الحديث في مواضيع أهم بكثير من أنك ترد على فلان اللي سمح لنفسو باش ينزل إلى أسفل السافلين ويتحفك بمعجم سوقي يحشمو المجانين حاشاك من أنهم يقولوه.
"هذه المدونة أثرت مجتمع المدونات التونسية... و لا أظن أن من يتعرض لمواضيع شائكة كالتي تتعرضون لها في هذه المدونة, ينتظر من الناس ان ترمي له الورود.."
خويا هاذي شهادة نعتزو فعلا بيها وبالتأكيد من البداية عارفين علاش قادمين. وإن كان في بعض المراحل حسينا بالإحباط وهو أمر طبيعي خصوصا أمام ناس منتدبة نفسها "لإعطاء النصائح وإملاء الدروس" في حين تهاجمك في شرفك في عوض تهاجم أفكارك وقيد على "اللي يسبنا نسبوه" وهو ما يعبر على عقلية الباندية والخلايق والكلوشارات.
على كل، كيما لقينا ناس تحاول تحبط عزائمنا لقينا زادة مجموعة نيرة اللي ساندتنا رغم اللي خذاو الريسك وحطو رواحهم في مدى النيران. وإنت كنت واحد منهم ونشكرك شخصيا على مساندتك.
"و لا أظن انه تراجع ..."
كلمة "تراجع" واللي نتصورها "قلقت" عبرات ليس معناها "تراجع عن التصنيف" لأنو آنا شخصيا ما نتراجع عن نظرتي الحالية لبعض المدونات إلا إذا غيرت نهجها. هذا أمر غير وارد لأنو الخطاب هو نفسو بل زاد في التطرف وانضمولو ناس أخرين. هاذا موش مهم في حد ذاتو.
اللي نقصد بيه من كلمة "تراجع" هو إيقاف نشر التصنيف هاذا ولو لزم إيقاف نشر قائمة "مدونات شقيقة وصديقة" زادة. على كل حال الأمر هاذا باش يتحدد عبر النقاش مع بقية الأخوات والمجال مفتوح للجميع لإعطاء رأيو.
شكرا ليك خويا وما تبخلش علينا بملاحظاتك.
عبرات،
كنت نعرف اللي عندك آفاق رحبة وباش تفهمني. المفيد وبعجالة:
موقفي من النقاش العلني: موافقة وما عندي حتى تحفظ على الأقل في المرحلة هاذي.
موقفي من التغيير:
إيقاف نشر قائمتي "مدونات تحارب الغباء بالغباء" و"مدونات غبية وحمقاء أيضا"
البحث في التوجهات القادمة للمدونة على ضو تقييم ما قمنا به لحد الآن
هاذي هي الخطوط العريضة اللي نقترحها.
في الأمان
العياش:
مرحبا بيك وسعيدة أنك تخليت المرة هاذي عن اللهجة التهكمية (ههه) وحبيت تناقش نقاش صحي.
نستسمحك يلزمني نغادر توة لكن تأكد أني باش نرجع لتعليقك بالنقطة بالنقطة وعندي برشة ملاحظات عليه. شكرا.
سي طارق (التعليق الثالث):
يا وخي حرقتلي الفيلم... ههه
كاريكاتير متاع أوباما جزء من تدوينة مستقبلية... ههه
على كل باش نعرج على كلامك كيف نعلق إن شاء الله على خونا العياش.
شكرا.
العياش:
وعدتك باش نرجع لتعليقك بالتفصيل وهاو باش نتناولو نقطة بنقطة.
>>> "آنا نعتي بغبي ما قلقنيش، و حرية التصنيف حرية تعبير عندي، كيف كيف نرمال، و كان تركزوا أموركم و تقراو إجابتي الوحيدة "إجابة على تساؤلات عبرات" تو تشوفوا لي حكاية التصنيف و الغباء ما جاتش على لساني، بالعكس خذيت وقتي و جاوبت على كل سؤال."
باهي بداية الشيء هاذا يتحسبلك. إنت زادة قلت على مدونتنا في ردك حمقاء وحتى حد فينا لا علق خاطر ما دامك تحكي على مدونة يعني على أفكار حقك وتنجم تقول اللي تحب. نعاودها ونكررها إحنا ما سبينا حد بكلمة غباء وفسرتها وعاودتها عبرات لكن لعباد هوما اللي ما يحبوش يفهمو ويقراو.
>>>>"معناها تتجرّؤوا تبهتوا من ردود فعل هكّة بعد ما في عنوان المدونة برك (مانيش باش نهبط لخرم التدوينات) تقولوا: " محاولة لإصلاح ما أفسده جيش من المتواطئين والمناصرين للعدو ضد وجود ومستقبل شعوبنا " و "هنا نفضح فقط من يتآمر ويتلاعب بوعي شعوبنا".. انتوما مدونتكم من أولها تبنات على كلمات كيف خيانة و عدو و تآمر، كيفاش تتشكّاو مبعّد من كلام "بهذه الخطورة"، بالعكس، صدقوني، ما تتصوروش قداش انجم نهبط لمستوى الحجاج متاعكم (آنا و المدونين الأغبياء الكل) و تشوفوا شمعناها تخوين."
سامحني الكلام هاذايا مردود جملة وتفصيلا خاطر من جهة انتوما ما تحبو تقراو كان اللي تخممو فيه وبالتالي تنطلقو من استنتاجات شكلية أولية وتلوجو على تعابير اللي "تبررها" في النص وهاذا موش كلام. خاطر يلزم تفهمني آنا فاش نقول. كيف قاتلك عبرات درا قداش من مرة اللي المدونة موش موجهة ليك ولا لعاشور وقاتلك اللي إحنا حكينا على القطط السمان أكثر مللي حكينا عليكم ما حبيتوش تفهموها هاذي. ما حبيتوش تصبرو شوية باش تشوفو مانا وين يصب. وهاذا موش معقول.
تقلي الحجاج وما الحجاج، تفضل حاجج وناقش واستدل وتوة نرجع عليك. فاش قام شادد في تفاصيل شكلية مالها معنى ومبلوكي الدنيا غادي؟ بالنسبة للتخوين، ظاهرلي موقفنا واضح ولا مزايدة مقبولة عليه.
>>>>>"باقي نرجعكم لمدونتي، عاودوا اقراو، لاحظوا لي نقدي كان ديما موجه للفكر الإسلامي و لأتباعه، و في برشة حالات تعرّضت للمد المخونج لي عايشتّو بلادنا، أما في حتى لحظة، في حتى جملة، ما وصلت قلت "هاذم عباد متآمرة علا مستقبلنا" ولاّ "هاذم أعداء وطن"، تتصوروا لي ما كنتش انجم مثلا نجي نقول لي تيتوف و عمروش و فري رايس متآمرين على سلامة الوطن و خونة لصالح السعودية الوهابية ولّي هوما أبواق العدو ووووو ؟؟؟ بالطبيعة عمري لا فكرت لحظة نعملها خاتر عندي مخ، على عكس كاتبات المدونة هاذي."
باهي سيدي، لنفترض جدلا أنو إحنا نخون ونتهم بالعمالة وخلافو رغم اللي النقطة هاذي جاوبت عليها سابقا. كيف حضرة جنابك تبدا تلم في المسلمين على بعضهم وتتهم فيهم بحاجات يعملوهم البعض ويوليو في عرفكم وأدبياتكم خاصية عامة ومشتركة للناس الكل آشبيك ما قلتش لروحك لكلام هاذا؟؟؟؟
كيف تقوم مثلا تقول اللي الإسلام يكره الفلسفة ويخاف منها ويحارب فيها لأنو عدو العقل، ما في بالكش اللي إبن عربي هو اللي ألهم كاتب الكوميديا الإلاهية وآشبيك طفيت الغزالي وابن رشد وابن سينا وآشبيك نسيت ما قلتش اللي ما فماش حضارة باعتراف الغرب نفسو نهلت واستلهمت ونقلت من الفلسفة اليونانية قد الحضارة العربية الإسلامية في أوجها. هاذا مثال وكان ندخلو في التفاصيل توة تشوف الجو. خويا العزيز، من حقك تنقد الإسلام ومن حقك ما تؤمنش بيه ومن حقك تخمم كيما تحب لكن موش من حقك تعمم وتتهكم وتعاود أكاذيب ناس أخرين.
>>> "في السونداج لي عملتوه، النتايج تكلمت بنفسها، و العباد أجمعت أنو التونسي و العربي بصفة عامة عايش بينات المطرقة و السندان: الدكتاتورية و الإسلام السياسي. ياخي نتوما دهشتوا، و بديتوا محاولات تبرير للتيارات الإسلامية. لنا آنا كنت انجم نتهمكم بالعداء لتونس، كنت انجم نقول لي نتوما تحبّوا تجيبوا موديل مجتمع مش متاعنا لذا نتوما خونة، أما لاااااا، نعرف لي نتوما على حسن نية، نعرف لي نتوما تشوفوا أنكم على صواب، أما آنا مانيش موافقكم، واكاهو. علاش كي ماعناش فرد راي احنا و لخرين نردوهم يحبولنا الشر؟ نفرضوا أني غالط في حساباتي و لي الفكر العياش تخلويض و لي الإسلام هو الحل، هل هذا يجعل مني خائنا و عدوّا ذو سوء نية؟؟؟ و طابور و هيلمان ووو ؟؟؟ خممو فيها بلقدا الحكاية هاذي."
بالنسبة لحكاية السونداج أولا نسبية والكلام هاذا قالتو عبرات برشة مرات وثانيا ما هياش مائة في المائة علمية ببساطة خاطر ما عندناش الوسائل باش نحسبو هامش الخطأ ومسألة أنو نبرر إلخ... كلام مردود عليك. فقط أرجع بالتوالي وعاود أقرى التدوينة مليح. فمة أسئلة تم طرحها كرغبة في إطلاق حوار حول الموضوع لكن حد ما حب يهتم وهاذي موش غلطتنا. إحنا ما قلنا حتى في بلاصة اللي "الاسلام هو الحل" وكان إنت تستنتج من عندك كيما غيرك جا واتهمنا بالتخونيج وتوة دورها اسلاموية ولغة فارعة فهاذيك مشكلتكم. ومشكلتكم لولة والأكبر أنكم ما تحبو تفهمو من النص كان اللي إنتوما تحبو تفهموه موش الشيء اللي يحب صاحب النص يوصلو. شدانكم في حكاية التخوين والعمالة ذران رماد في العينين وإنت تعرف اللي فمة برشة حاجات قلناها عندها ما يبررها واللي إحنا كتبنا في حاجات بعيدة عليكم أكثر من الحاجات اللي تمس مدوناتكم.
>>> "حاجة أخرى، المدونة متاعكم تضحّك برشة بسبب الجدية المفرطة، عاملين أقسام و جداول و جايبين ما عندكم، و عندكم نقص مرضي من روح الدعابة، مثلا كيف تراب بوي يقول جربوعستان تشوفوها طول تحقير الوطن و نجبدوا طول الإستقلال، مخكم الإسلامي ما يتخيلش إمكانيات الفدلكة، و صدقوني، نقص الضحك و الدعابة، هو الغباء الحقيقي."
ظاهرلي كل واحد يعمل آش يحب ويكتب بالطريقة اللي تناسبو وكلامك على الجدية كلام أقل ما يقال عنو كلام موش في بلاصتو. أولا هاذي مدونة تعالج في قضايا جدية موش سيرك ولا سينما. وما تستناش من واحد يكتب على مآسي غزة مثلا ولا الديكتاتورية ولا الإسلاموفوبيا باش يقوم يشطحلك بالمحارم. وكيف تقول أنو نقص الضحك غباء حقيقي فهذا يدل فعلا على غباء حقيقي خاطر يلزم تفرق بين شخصية الكاتب وشخصية الإنسان. مثلا فيروز كيف ما تضحكش موش معناها هي فنانة طافية ونانسي عجرم كيف تشطح على طار بوفلس موش معناها قمة الطرب والفن.
باش نعرج على ملاحظة جربوعستان. جاوبك طارق على أمريكا قلت اللي هي موش مرجع. هاو آنا باش نجاوبك على فرنسا اللي هي مرجع بالنسبة ليك وهاذا حسب مدونتك بالطبيعة. الكنار اونشاني وكنال بليس هوما قمة الساتير في فرنسا. وقد ما تبعتهم يجيبو الرئيس وعايلتو والوزرة وغيرهم وغيرهم في صور أحيانا تحشم وحد ما يتكلم خاطر هاكة من حرية التعبير. آما عمري ولاشفتهم يرسمو ولا يقولو على فرنسا البلاد ورمز وحدة الفرنسيين والشئ المشترك بيناتهم كلمة ولا لقب خايب. خاطر البلاد رمز وما يلزمش يتمس. لبلاد ندافعو عليها ولو ماناش متفقين مع توجهاتها ولكن مانمسوهاش لا بنص لا بكلمة لا برسم تماما كالمقدسات الدينية
اللي هي رمز لبعض الناس واللي واجبنا في احترامهم كأشخاص يمر ضرورة عبر احترامنا لعقائدهم ورموزهم ولو نختلفو معاها. هاذيكة هي الحد الوحيد لحرية التعبير في تقديري. أنو سي النبار هاذا يقول التوانسة الكل بوهم على خوهم جرابع نجم نقبلها ولو موش موافقة عليها لكن أنو يقول على تونس جربوعستان فهذا غير مقبول.
نصيحة أخيرة، تعلم أقرى بالقدا النصوص وماتفلتش الجزئيات اللي أحيانا عندها دور كبير باش تفهم المعنى ورد بالك زادة من عقلية القطيع وتأثير الآخر عليك. خلي عندك نظرتك المستقلة والخاصة اللي حتى حد ما ينجم يأثر عليها. هكة أومورك إنت بالذات ممكن تتصلح.
يا عبرات،
ويني تانيت آشبيها ما تجاوبش لا عالمايل ولا تكوناكتي عالشات؟
آشنوة اللعب هاذا؟؟؟؟؟
عليسة،
أرسلت إليها عدة رسائل ولم تجبني أيضا. لكنني أتذكر أنها تحدثت الأسبوع الفارط بخصوص مؤتمر يخصها عما قريب. قد يكون هذا هو سبب غيابها هذا الأسبوع.
ههههههههه
بدون تعليق
"آما عمري ولاشفتهم يرسمو ولا يقولو على فرنسا البلاد ورمز وحدة الفرنسيين والشئ المشترك بيناتهم كلمة ولا لقب خايب".....
ماو قتلكم اغبياء اما ماتزيدوش تستغباونا....وماتستشهدوش بحاجات مالواضح والجلي انكم جاهلين بها
ما فماش ما أغبى من واحد يلوح تعاليق كيما هكة لا راس و لاساس, لا دليل, لا منطق ولا مرجع...
و ياخى قلي؟ إنت موش عاهدي بيك تتشحت في سيبوني، في أعتقوني، في فكو علي. ظاهر فيك إنت زادة تموت على التمرديد... أما بونتو فيك باش نخليك تموت بحسرتك.
والله مااغبى مني كان وحدة تجبد على كانال + ولا الكانار اونشيني وهي بالحرام تعرفهم كان بالاسم وكمل تجيب في حكاية فالحيط متاع واحد عمرو لاحل لا كانال لاقرا الكانار...اما كي تحبوا اتدغفوا الناس ماو قلتهالكم جيبوها بفيانة موش بتدرويش وهاو كان نهار تلقالي نومرو مالكانار اونشيني مافيهوش تقوحيبة على فرنسا ولا حلقة من حلقات ''الغرولاند '' ولا '' الاس ا في '' تنجموا تجيوا تناقشوني....صديقكم الاسلاموفوبي و العميل الصهيوني هههههههههههه
يا علّيسة، لوغة "ما عندكش الحق تعمم" لغة متجاوزة من هاك العام، عندي الحق نعمم حاجات قابلة أنها تتعمّم.. في حكاية كره الإسلام للفلسفة، ساعة مش معناها ثمة فلاسفة مسلمين معناها الإسلام ما يكرهش الفلسفة، مثلا، الكنيسة تكره الفلاسفة و هذا لا ينفي أنو فلاسفة كبار كيف ديكارت و كانط كانوا مسيحيين... ثانيا، آنا أثبتت بحجج تاريخية كره الإسلام للفلسفة بمعنى أنو الفلسفة ازدهرت كأخذ مسافة عن الدين. حاجة أخرى، الفلسفة بحر كبير و الإغريق كان عندهم برشة مدارس فلسفية، وقتلي توسعوا المسلمين و تنفنفت أمورهم مالغنائم (كالحكاية لي تسميوها فتوحات) دخلنا في عصر الإشعاع الثقافي و الترجمة، وقتلي المسلمين جاو يترجموا عملوا فرز للمصادر (نفس العملية لي قامت بيها المسيحية في القرن3 ميلادي) و استعملوا الفلسفة لي ماشية معاهم و لم يترجموا أصلا الفلسفات المتعارضة مع اعتقاداتهم. و بربّي كيما قتلك أقرى ابن خلدون شيقول على الفلسفة في المقدمة. الفلاسفة المسلمين لي ذكرتهم صحيح مهمين، لكن لكلهم كانوا فلاسفة فقه، ماشين في التيار، من أنواع أوغسطينوس (سانت أوقستان). و الدليل أنو مع تطور الفلسفة و دخولها في العصر الحديث لم يزد المسلمون شيئا للعالم الفلسفي، و اليوم الفلسفة الإسلامية تتقرّى كيف لي يقرا في الآثار ولاّ في التاريخ القديم.
حاجة أخرى، قلت حاجة غالطة على روح الدعابة عند الفرانسيس، قلت أنهم ما يتهجموش على رموز الوطن، بالطبيعة غالط، حاول تتفرّج في برنامج "غرولاند" يجيبوه كل نهار أحد في كانال، البرنامج هذا عاملين فيه ساتير عالعلم الفرنسي، و عاملين بلاد كاملة خيالية تعرضك فيها مفاهيم كيف جربوعستان. إذا هيّا حاجة تمسّك شخصيا، مش مشكل حتانا ثمة حاجات تمسني، أما ما عندكش الحق تصوّر حدود لي حرية التعبير خاصة خاصة خاصة بقذف الآخر بالاستهزاء بالوطن و الكلام الصعيب هذا، كان جا تراب بوي يستهزأ بالوطن راو مش حالها أصلا المدونة متاعو..
في حكاية الجدية متاع مدونتكم، بالطبيعة لازم جدية باش تحكيوا على مواضيع جدية، أما ثمة جدية من جدية، مدونة طارق الكحلاوي جدية أما ماهيش مكثرتلها، نتوما كي قريت فازة "علّيسة (محرّرة ومشرفة على متابعة الإعلام والنشر الالكتروني) وتانيت (محرّرة ومشرفة على الملف العلمي والتقني). " تطرشقت بالضحك و نضمنلكم الّي مانيش الوحيد، بون هذا نقد صغير لأسلوبكم و جاي كنصيحة، إذا نتوما الخط التحريري متاعكم هاذاكا شنوة طالب صحة و بالشفا..
@Ayech
Le Groland c'est samedi 20h15 juste apres Ardisson
(((((((:
مممممم!
الحاجة الباهية اللّي تتحسب هنا لعيّاش والعلّيسة إنّو إرادة الحوار مزّالت موجودة.
موش مشكل في إنّو "العرك" يتواصل...بل يلزمو يتواصل على خاطرو هو الضامن الوحيد لفضاء مدوّناتي حي. المشكل في الأرضيّة!
الأرضيّة هذية آنا نشبّهها بشعرة معاوية...ونخلّي التأويل لغيري
والله فى الدونة هاذية زوودتولها برشه فى الديبلوماسية والمجاملة والتعبير المتوازن...حتى اللى داخل يسب وخارج يسب قاعدين ترجعوا عليه بكل احترام وادب ولذا انا باش نقترح عليكم تحررشوا شوية فى اللوغة اي بما يليق بالمتلقى المشاكس وكفكرة بسيطة..مجرد اقتراح..ان اطلاق صفة الطابور الخامس على جماعة التطرف العلمانى هو من قبيل الديبلوماسية المفرطة فكان من الاجدر تسميتهم بالاسم اللذى يليق بهم وهو حزب فرانسا انا على يقين انهم لن يحتجوا على هذا التعريف لانهم يسعون لذلك امام الجميع وفى ضوء النهار بل هم سيعتزون بهذا ايما اعتزاز خاصة وانه سيربطهم بحبيبتهم لغويا على الاقل...فكفانا طابورا ولنسمى القط قطا....
سي الموسوعة متاع جينيف:
توة كيف آنا ما نعرف شيء ونحكي بالغالط، آش فيها كان تتواضع شوية وتعلمني حويجة ولا تصلحلي فكرة؟ باش يعايروك؟ باش ينقصو من قيمتك؟
شفت علاش إحنا ما نتقدموش؟ وشفت علاش قالتلك عبرات راك إنت بالذات تجي تطبها تعميها؟ كان نحيت عليك من التنبير وها الشعور الزائف بأنك تعرف أكثر من الناس لخرين خيرلك وأنفعلك وأكثر مصداقية ليك...
بالرغم انو لهجتك فيها برشة احتقار واستهزاء لكني بش نوضحلك...ميش اول مرة تحكيوا فيها حكاية مالحيط هنا ..المعضلة انكم كان جبتدوا هالسيرة في قالب حديث سريالي كيما اللي تعملو فيه كنت انجم نقول بڨلة ليها ونتعدا لكنكم تلاثة مرات لتوا في صدد ''مقارعة الحجة بالحجة '' و تسيبوا فكرة ولا مثال مڨحول لذا الناس العاديين(اصدقائكم) ينجموا مايحلبوش لكن كي يبدا واحد غبي كيفي وتحبوا تقنعوه بحكاية ميشي هي يبطى فالهبطة
أخ العياش:
>>> "يا علّيسة، لوغة "ما عندكش الحق تعمم" لغة متجاوزة من هاك العام، عندي الحق نعمم حاجات قابلة أنها تتعمّم.."
هاذا صحيح في حالة أنو فمة معايير موضوعية تقبل أنك تاخو الريسك و تعمم. خاطر كيف تشوف الأمور بشكل عقلاني حيادي موضوعي، في أي مجال إذا عندك شك ولو واحد في المائة اللي فمة حالة خاصة تمنع التعميم فإنو المنطق يقول أنك ما تعممش قبل ما تعزل على الأقل الحالة الخاصة هاذيكة وتعالجها بالشكل المناسب... هاذا من ناحية المبدأ... توة هات نشوفو التطبيق و في موضوع الفلسفة والإسلام بالذات.
>>>"وقتلي المسلمين جاو يترجموا عملوا فرز للمصادر (نفس العملية لي قامت بيها المسيحية في القرن3 ميلادي) و استعملوا الفلسفة لي ماشية معاهم و لم يترجموا أصلا الفلسفات المتعارضة مع اعتقاداتهم. و بربّي كيما قتلك أقرى ابن خلدون شيقول على الفلسفة في المقدمة. الفلاسفة المسلمين لي ذكرتهم صحيح مهمين، لكن لكلهم كانوا فلاسفة فقه، ماشين في التيار، من أنواع أوغسطينوس (سانت أوقستان)."
أولا، الخطأ رقم واحد هو أنك تتعامل مع الإسلام ككتلة واحدة في حين أنو فمة برشة مدارس إسلامية فقهية وتشريعية و غيرها تنتسب للإسلام هذا عدا المذاهب والفرق على تشعبها وإختلافها. وكيف تقلي اللي الإسلام (من غير ما تفرق ما بين المذاهب والمدارس والفرق متاعو وتتناولو ك"كل لا يتجزأ" أو كيما قال طارق نقلا على التقرير متاع الرنيميد "كتلة صماء" ولاحظ لهنا خذيت كان المصطلح ونناقش في موضوع الفلسفة والإسلام موش موضوع الإسلاموفوبيا) فأنو هاذا خطأ كبير ما يقبلش أي ناقد موضوعي (وظاهرلي إنت صرحت باللي تنقد في الإسلام من ناحية معرفية بحتة) بالنوع هاذا من التعميم. هاو باش نقلك علاش.
المؤكد حسب دراسات قديمة وحديثة أنو تناول الفرق الإسلامية كالمعتزلة القدرية للفلفسة يختلف على رؤية الفرق الصوفية مثلا كيما النقشبندية وغيرها. وحاليا نقرى في كتاب إسمو "الشيخ الاكبر ابن عربي صاحب الفتوحات المكيه" إن شاء الله توة نعملو تلخيص كيف نكملو حكى بالذات على النقطة هاذية وقالك مثلا إبن عربي تم تكفيرو رغم أنو متدين بشدة من قبل فرق أخرى كيف خاض في المسائل الوجودية واختلفو النقاد القدم والجدد هل هو ملحد ولا مؤمن. على فكرة ابن عربي محسوب على الصوفية ويعتبر من أكثر الناس اللي نقلو الفلسفة اليونانية القديمة واللي يعتبروها بعض المذاهب كفر بالدين وإلحاد. معناها تشوف مثلا في حالة إبن عربي واللي كتاباتو ألهمت إصلاحيين وأئمة في القرنين التاسع عشر والعشرين، كيفاش تطرح نقاش عقائدي كبير وخلاف حول ماهية العلاقة ما بين الإسلام والفلسفة وأغلب أهل الذكر يقلك يلزم طرح الموضوع بطريقة أخرى "آشنية علاقة الفرق والمذاهب الإسلامية بالفلسفة؟". نفس النقاش تطرح لما تم تناول فلسفات إبن رشد وإبن سينا وغيرهم.
الخطأ الثاني، تقلي الفلاسفة المسلمين تناولو الكلهم الفلسفة اليونانية من وجهة نظر دينية. موش صحيح وإبن عربي أبسط مثال.
تقلي المسلمين قامو بفرز الفلسفة اليونانية. نفس الشيء نقلك تناول الموضوع من ناحية الفرق الاسلامية وما تجمعش الناس الكل في سلة واحدة.
>>>>"ثانيا، آنا أثبتت بحجج تاريخية كره الإسلام للفلسفة بمعنى أنو الفلسفة ازدهرت كأخذ مسافة عن الدين."
ما نوافقكش ونوافقك في آن واحد:
ما نوافقكش إذا كنت تقصد أنو كانت الفلسفة مهرب من الدين إذا بالطبيعة تكلمنا على الأمر من زاوية عقائدية بحتة. موش بالضرورة وهاذا زادة يتعلق بتوجه كل فيلسوف ويلزم يتم التعامل مع كل حالة بشكل منفرد.
ونوافقك على إعتبار أنو نمو حركة الترجمة ونقل علوم الأمم الأخرى خلات المسلمين عموما يجنحون إلى العقل في تعاملهم مع ماهو دنيوي مادي محسوس وهاذاكة علاش ازدهرت الرياضيات والفلك والطب وغيرها من العلوم.
المهم لهنا هو ضرورة تنسيب الأمور.
>>>"قلت حاجة غالطة على روح الدعابة عند الفرانسيس، قلت أنهم ما يتهجموش على رموز الوطن، بالطبيعة غالط، حاول تتفرّج في برنامج "غرولاند" يجيبوه كل نهار أحد في كانال، البرنامج هذا عاملين فيه ساتير عالعلم الفرنسي، و عاملين بلاد كاملة خيالية تعرضك فيها مفاهيم كيف جربوعستان."
شوف آنا تكلمت عاللي نعرفو (وعمري ما نفيت اللي ما نعرفوش). في كنال + نتفرج مثلا على "les guignols" تقريبا كل يوم. وسنحتلي الفرصة باش تفرجت على برنامج غرولاند ماغزين بعض المرات خاطر آنا موش وقتي الكل فارغ وما عندي ما نعمل. لكن اللي شفتو في مجمل ها الحلقات هي تعليقات في قمة السخرية والنقد للرئيس ومرتو وولدو والوزرة متاعو وللفنانين ورجال المجتمع وغيرهم. كيف مثلا تشوفهم في غرولاند متاع الجمعة اللي فاتت يجيبو ساركوزي في طيارة يقنبل عالإليزي ويناديو لشيراك يحبوه يرجع يحكمهم. وكيف ينقدو البذخ متاع كارلا ورشيدة داتي والخطط الفاشلة متاع روزلين باشلو ويصورو في "les guignols" الوزير لول على أساس إنسان ما عندوش حلول ويحكيو عاللي صار في غوادلوب وغيرو... تعرف اللي فمة برشة نقد وتشوف ناس تحط في مشاكلها على الطاولة وتنقد فيها وتلوجلها في حلول. موش كيفنا أحنا ثمانية شهور الدنيا شاعلة وحد ما في بالو وكيف نهار واحد غلط, جا يقول "صباح الخير" قال "يحيا هاذاكة" راصاتلو في دار خالتو... زعمة كان يقول اللي يقولوه جماعة البرامج هاذي آشنوة يصيرلو؟ يعدموه؟
آنا حسب ما شفت عمري ما حسيت اللي فمة مس مباشر بفرنسا كرمز. إنت قتلي عملين صاتير على العلم. داكور. آنا الحقيقة ما شفتوش ومانيش نغم فيك كيما قال السيد متاع سويسرا. وتوة كنتيجة للحوار حول النقطة هاذي علاش مانطوروش النقاش لأبعاد أخرى؟ في عوض نحكيو على الأمريكان والفرنسيس هات نحكيو على رواحنا. موش خير؟
هات نناقشو لحكاية من زاوية أخرى: "هل لحرية التعبير حدود وإذا كان لها حدود، فماهي هذه الحدود؟"
تيان هاو موضوع جدي للنقاش بعيد على حكايات التخوين والسبان والتنبير. خلينا إيجابيين وإيجا نحطو طاولة وأربعة كراسي وناقشو الأمر بكل هدوء. موش خير؟
على فكرة العرض متاعي جدي للغاية وموش مجرد كلام وموجه ليك وللناس الكل اللي تحب تقول حاجة في هالموضوع.
شكرا لهذا المستوى من النقاش وفي انتظار ردك.
تحياتي
عالسلامة السيد النائب العام اللي مهمتو ديما يتهم ههههه:
شكرا لمرورك خويا وماذابينا كان تثري الحوار بمساهماتك. نعرف اللي عندك برشة حاجات تنجم تقولهم وتنفعنا بيهم. :)
آنا شخصيا عندي إيمان عميق اللي نجمو نتجاوزو كل إختلافاتنا ونأسسو لثقافة حوار بعيد عن الشعارات والإتهامات والحكايات الفارغة.
شكرا ومرحبا بيك.
سيد أبو العربي أفندي:
إحنا عنا مثل ياسر مزيان في تونسنا الخضراء يقول "اللي يشتهي شهوة يقدها في عشاه". خويا العزيز، ماهو حليت مدونة سميها "حزب فرانسا" ولا حتى "حزب الموزنبيق" وحلل وناقش وعبر ونوعد خويا نتعدى نقرالك وإذا عندي تعليق ما نبخلش عليك.
شكرا ومرحبا بيك.
اهلا عليسه ..
مواصلة للنقاط اللي صغتهملك باقتضاب عند طارق هنا ، هاني جيت باش نزيد نوضّحلك حاجات اخرين
رغم "انّي طحت من عينك" اللي قلتها انت ، تعني فيما تعنيه انّو غير مرغوب في زيارتي :) لكن واجب التوضيح اقوى منّا الزّوز
بداية ، ما ننكرش انّي عندي صداقات بالعديد من المدونين، سواء ، وهذا حسب القايمة متاعك، "اشقاء اصدقاء" او "اغبياء" او "حمقى"
و فيهم اللي صداقتي بيه ماهيش تدوينية فقط ، و انما نتراسلو بالايميلات ، نتكلّمو بالتاليفون ، نثرثرو شويّة في التشات احيانا ، و نعرفوا برشه حاجات حتى على الحياة الخاصة متاع بعضنا
و نكون معاك شفاف اكثر ، ما ننفيش تأثير هالصداقات (الى درجة معينة بالطبيعة) في امتعاضي من التصنيف اللي عملتوه ، لانّو ايّ حدّ طبيعي و سليم ، يتحرّك و يحسّ وقت اللي يشوف صديقو متوجّهتلو تهمة ماهيش شويّة كيما : طابور خامس
و رغم ذلك ، ما قمتش بدور قاردكور ، و ما انخرطتش في سلسلة السبّ الاخلاقي اللي تعرّضتولو ، و اللي موش عيب انّو الواحد يقول : عندكم فيه قسط و دور ، الا في حاله وحدة انكم تكونو نبيّات قدّيسات معصومات من الخطأ
ثانيا : ورد في برشة تعاليق و برشه تدوينات انّو انا من الناس اللي يكيلو بمكيالين
شوف ، مانيش باش نجري نبنــّك في كرسي الضحية ، و نعمل مندبة و نقول انا راني رقم واحد في الموضوعية و في النزاهة و الشفافية
لا
انا منحاز .. كيما ، ونسطّر على الجملة اللي باش نقولها توّ: كيما ايّ واحد منحاز
الانحياز موش تهمة ..
و الحياد المطلق راهو وهم .. وهم جميل
واحد بركة ينجم ينجح في الحياد المطلق ، وهو الميّت :)
الانحياز شيء طبيعي ، لكن العقل يتدخّل في : لمن تنحاز ؟ لماذا تنحاز ؟ كيف و متى تظهر انحيازك ؟ و كيف ومتى تخفيه ؟ ـ
اذا انت كنت حطّيتني في قايمه اصدقاء و اشقّاء فقط ، يمكن كنت نشكرك على ثيقتك و نقلّك ارجو اني نكون عند حسن ظنّك
لكن حطّانك ليّ في قايمة اصدقاء ما حسّيتش الهدف منّو صداقة مبدئية ، و "شقوقية" (ما نعرفش المصدر من كلمة "شقيق" هههه ) حقيقية ، بقدر ما كان في اطار مقارنتي بالـ :"اغبياء" ـ
بصراحة حسّيتك استعملتني
و هاو نوضّحلك اكثر
رغم انّك عملت تدوينتك الطويلة و العريضة اللي وضّحت فيها اسس تصنيفك للاغبياء ، و كأنّك كنت تتصوّر بنوع من المثالية الزائده ، اللي تتحوّل احيانا الى .... بأنّهم باش يجيو يقولولك : آه ، صار انت هاذا علاش صنّفتنا اغبياء ، ماله عندك الحق ، بربّي آسفين على خاطر ما فهمناكش مليح ملّوّل ، و هانا توّ اقتنعنا بغبائنا
توّ هاذا كلام ؟؟
قلت رغم تدوينك "التوضيحية" هاذيكه ، ما كانتش كافية باش تغمّضلنا عينينا على انّو الخيط الرابط ما بين "أغبياءك" الكلهم ، ايه ، الكلهم ، دون استثناء : هو لادينيّتهم
كنت تنجّم تكون اكثر "مكر" :)، و تحطّ وحيّد و الا ثنين من المدوّنين المسلمين ، لكن اللي مواقفهم السياسية متماهية مع الطابور(الطابور كيما انتوما تشوفوه بالطبيعة خاطر ما ثماش طابور واحد ) مثلا كنتو تنجّمو تستفيدو من "القزورديين ... كانو ينجّمو يأدّيولكم خدمة كبيرة و هايلة .. و هي انهم مسلمين لكن متواطئين
هكّه يمكن كانت الضربة تجي ميته، وتحدثوا نوع من الايهام بالتوازن
عملتو صندوق متاع لادينيين ، محطوطين تحت يافطة "حمق و غباء" في مدوّنه اسمها :"ضدّ الطابور الخامس" ـ
اناهي الاعصاب البشرية اللي يمكناها تتحمّل هاذا ؟؟
و كذرّ بعض الرّماد ، هات نحطّ وحـيّد و الا ثنين من اللادينيين مع "الاصدقاء" و "الاشقاء" باش نعطي "طابع" محايد للتصنيف (و نسطّر تحت كلمة "طابع") ، لتوجيه الاهتمام عن التوجه الديني للمدونه ، و اللي هو من حقّك ، لكن دون المس من اشخاص الآخرين
ثمّه شكون قال : هاو ماندلا مسمّي مدوّنتو اصلا : لا للغباء ، و يقصد بالغباء برشة انماط متاع تفكير ، من بينها : التفكير الديني .
انا ما نراش في التسمية مشكل كبير(نقول في التسمية اللي هي كانت موضوع احتجاج و محاججة ) طالما انّو ما سمّاش مدوّنتو (و على سبيل المثال) : لا لعمروش ، و الا : لاسلام آية
رغم انّهم موش كلّ اللادينيين بالضرورة محطوطين في شكارة وحده ، لادينية الليبيرالي ، ماهيش هي لادينية اليساري ، و لا الشيوعي ، و لا النيتشوي ، و لا الماركسي ، و لا الوجودي ، و لا العلماني
اش قولك كي نقلّك انّي ، و بصيفتي اللادينية هاذي ، نعتبر انّو فمّه "لادينيين" أخطر من الاحتلال نفسو ، و من الاستعمار نفسو
انا نحطّ تصنيفي "صديق" والا "شقيق" في اطار "اللعبة" هاذي ، و هاذاكه علاش مارتحتش
ايه ، استنّى اسّعه ، نبقاو في القايمه لولى ، علاش "صديق" و "شقيق" ؟؟ شنوّه الفرق ؟ و انا ، كنتو تعتبروني "صديق" و الا" شقيق" ؟ ـ
هاو نعطيك دليل اخر على التوجه الديني للمدونه ، و اللي تحاولو تخفوه . رغم انكم كنتو تنجّمو تفصحو عليه بكل حرية
كلمة "صديق" و كلمة "شقيق" في القايمة الاولى ، انا هاو كيفاش قريتهم :"شقيق" يعني ديني/ مؤمن/ مسلم/ اسلامي ... الخ
و "صديق" يعني لاديني /ملحد/لااسلامي/ لكن موش معروف عليه النقد التهكّمي على الاسلام
يعني هنا : مقياس و جوهر التصنيف هو الدين موش و لا شيء اخر(غزة و المقاومه مثلا)ـ
و لو كان المقياس هو غزّه ، راكم حطّيتو مدوّنة عياش مع الاصدقاء لانّها من اوّل المدونات اللي عبّرت على مساندتها للمقاومة إبّان الحرب ، و بكل شفافية و وضوح و شجاعة ، في تدوينه اسمها مساند للمقاومه الاسلامية رغم الحادي
هنا : http://3ayechmelmarsa.blogspot.com/2008/12/blog-post_28.html
و دعا للتظاهر
هنا http://3ayechmelmarsa.blogspot.com/2008/12/blog-post_9430.html
و احتج بالتصاور على مصادرة حق التظاهر هنا
http://3ayechmelmarsa.blogspot.com/2008/12/blog-post_9430.html
قبل حتّى ما "تتصنع" مدوّنتكم ، و لانّو حكى على المظاهرات المساندة للمقاومه ، و عطانا بالصّورة كيفاش حاول يشارك في احداها ، و كيفاش منع من ذلك
صحيح انّو ما اخفاش معارضتو لحماس بوصفها احد تمظهرات "الدين السياسي" ، و اللي من حقّو هو يرفضو كيما من حقّكم انتوما تهلّلولو
واحد كيف هاذا يتحط مع الطابور؟؟؟؟؟؟؟
و الا فقط على خاطر ملحد و يحب سارتر و يلقى متعة في الحديث على الفلسفة كيما يحكي على فيلم ، و اللي هو بين قوسين اسلوب ماهوش في متناول ايّ حدّ ، و الا خاطر يفرح بالبيرة ، كيما تفرحو انتوما بالشكلاطة:) ربما و الا بالبارفان والماكياج السّينيي :)ـ
كل حد فينا ، الطفل اللي ساكنو يفرح بحاجة :)
اما خير يحكي عالبيرة ، كيما يحكي على ايّ حاجة في حياتو ، بالشكل الواضح هاذاكه ، و الا يتخفّى و را مجهول ، كيما يعملو البعض ملّي حاطّينهم في "الاصدقاء" و "الاشقاء" ، و يبعثو التعاليق البورنوغرافية ، تدوينات ذات لغة صدّقني اذا ننشرها ، يصاب كلّ القرّاء بالغثيان ، اللي نطّقتني المدة الاخيرة و خلّتني نكتب هاك التدوينه الحمراء متاعي ، و اللي بقدر ما نأسف انّي اضطريت كتبتها بقدر ماني مانيش نادم عليها .. لانّها كانت فعلا بمثابة انتيفيروس ناجع ، و ناجع جدا .
انتوم ما جاوبتوش على ايّ تدوينه ملّي تعرّضت فيهم ليكم بالنقد
في جانفي ، وقت "تصنعت" مدوّنتكم (!)عبّرت على تحفّظي من التصنيف
ما جاوبتونيش
بعد احداث غزة ، كتبت في الموضوع اكثر من مرّة ، و تحلّ نقاش بييني و بين فري
و ما جاوبتونيش
الا انّو يكون وقتها هو يحكي على لسانكم
طلبت ازالة اسم مدوّنتي من اية قايمة ، و عطبت اسبابي
نحّيتوني بالسكات
و ما جاوبتونيش
يمكن ماكش قاعدة تقرا في كل التدوينات ، الشي اللي ما يضفيش الموضوعية على تصنيفك
لانّو اللي ما يقراش كل التدوينات ، على انا اساس يصنّف ؟؟؟ـ
في الختام ، نعاودلك نفس الملاحظة اللي خلّيتهالك عند طارق ، اذا انا "طحت من عينيك" ، فإنّو ما يجيش منّو تحكي عليّ بالسلب في مدوّنات اخرى ، لانّو سلوك كيما هاذا ، يصبّ في نفس مصبّ التصنيف : وهو عدم الرغبة في التحاور
شكون قالّك اللي انا باش نتعدّى بحذا طارق و نقرا تعليقك عليّ؟؟ افرض ما تعدّيتش ، علاش تحكي عليّ بشكل جانبي ما يسمحليش بالرد؟
هاذا حوار ؟؟ كان جات عندك رغبة الحوار ، راك من جانفي جيتني و حكينا و تحاورنا
المنطق يقول هكّه
مادام طحت من عينك ، لا تحكي معايا (اللي هو قرارك انت)، و لا تحكي عليّ زادا
تنجم تحكي عليّ في ايمايلاتكم الداخلية انت و البقية
اما البلوغسفير راهو عبارة على : حديقة عمومية
على فكرة
انت في اكثر من مناسبة اشرت لتدوينتي البذيئه
و اللي بالمناسبة ، ما فيها من البذلءة الا مفردة وحده .. هي فعل امر في صيغة الامر
و حروفو محرّفة زاده .. دلاله على اني .. باقي محترم العباد
ثم انّو الفعل هاذا .. موجود ولد عمّو في القرآن
لكن كيف نقلّك اللي انا حكيت هكاكه بعد ما وصلتني تعاليق فيها الاتي
دعوة لممارسة الجنس مع امي :)
و موش هاذا برك
معاها وصف دقيق لمقدّمات العملية هاذي
يعني .. تحبّ نزيد نوضّح ؟؟؟؟؟؟؟؟؟؟؟
لا
ما نزيدش نوضّح
وقت يجيك تعليق يقلّك اللي امّك ما ارضعاتكش حليبها و انما ارضعاتك .........اشياء اخرى ... خاصة بالانثى
نزيد نوضّح ؟؟؟؟؟؟؟
لا ما نوضّحش
وقت يجيك تعليق يقلّك انت ماك الا ثمرة علاقة متاع خمسة دقائق في توالات
نزيد نحكي على التعاليق اللي تجيني ؟؟؟؟؟؟؟؟؟؟؟؟؟؟؟؟؟؟؟؟؟؟
لا
ما نحبّش نمسّخلك مدوّنتك
ناكلها انا في عظامي
ميسالش
و كي نتنفّس بكلمه ... مشقلبة ... غلبني "اصلي" و تربيتي باش نقواها كيما يازم تتقال في الشارع
نولّي انا البذيء
و نولّي انا اللي طحت من العينين
و تولّي الناس تقطّع فيّ و تريّش في المدونات الاخرى دون علمي .. بكل نميمه
كيما قتلك
نخاف ننشر التعاليق اللي نطّقوني هكّاكه ..و اللاهي انت اوّل من يبطّل التدوين
و مازلت نحتفظ بكل التعاليق هاذيكه
و بعمري ما تبلّيت على حدّ
فقط قلت : هيّا نتناقشو في الدين دون تطييح زرصة و طمزان عين
و عينك ما تشوف الا النور
ولّيت انا لم ارضع حليبا من امي.. بل رضعت سوائلها الاخرى
بربّي فك عليّ
merde
مانعرفشي علاش وقت اللي قريت التعليق متاع براستوس اول حاجة ضربت فى مخى هى تصويرة بيريز وهو يدافع على اسرائيل ويتشكى ويتبككى من الصوارخ لى هابطة على سديروت...نفس المنطق...نفس الاسلوب..نفس الحجج.....دهاء متاع صهاينة ...بدون ذكر اسباب ومسببات..هكه ابو عربي راقد فى الليل قام الصباح مشى للكلافييه وبدا يسب فى براستوس....براستوس مسكين خاطيه لا يخبش لا يدبش....رانى مستغرب هالقدرة على الكذب وتزييف الحقائق قداش عندها ناس يؤمنوا بفاعليتها فى هالعالم....تى ماهو على الاقل كى الواحد يحب يكذب يكذب كذب قابل للتصديق موش يوللى يجيب ويجلب...بربي يززينا من حكاية الاميرة الجميلة والصعلوك الشرير....التدوهين عندكم وبات
عليسة + عبرات:
آسفة على تأخري عليكما وشكرا على هذه المبادرة.
ما أقترحه هو وضع كل المدونات في نفس القائمة ما عدى تلك التي طلبت الإنسحاب أو تلك التي وجهت لنا عبارات نابية.
فيما يخص المدونة لا تغيير ضروري حسب رأيي.
شكرا.
تانيت + عليسة:
رؤيتي للتغيير بالمختصر المفيد تتلخص في النقاط التالية:
1- حذف كل القائمات بما فيها قائمة "أشقاء وأصدقاء".
2- تغيير عنوان المدونة.
3- تغيير تعريف المدونة.
4- تحيين وتعديل قانون المدونة حسب التغييرات السابقة.
في انتظار ردودكن.
شكرا