أيّ قلْنا السّلام عليكم...
آشنيّ أحوالكم؟ آنا اليوم باش نحْكيلكم على بعض اكتشافاتي وقراءاتي في وسائل الإعلام بصفة عامّة... هو لحقيقة برْشة حاجات يستحقّوا أنّو الواحد يتكلّم عليهم لكنْ لضيق الوقت والمساحة وباش تكون تدوينتي خفيفة الظلّ عليكم ان شاء المولى، باشْ نخْتار بعض المواضيع اللّي شدّت انتباهي أكثر من غيرها وتتماشى مع هدف مدوّنتنا هاذي.
آشنيّ أحوالكم؟ آنا اليوم باش نحْكيلكم على بعض اكتشافاتي وقراءاتي في وسائل الإعلام بصفة عامّة... هو لحقيقة برْشة حاجات يستحقّوا أنّو الواحد يتكلّم عليهم لكنْ لضيق الوقت والمساحة وباش تكون تدوينتي خفيفة الظلّ عليكم ان شاء المولى، باشْ نخْتار بعض المواضيع اللّي شدّت انتباهي أكثر من غيرها وتتماشى مع هدف مدوّنتنا هاذي.
في البداية، باشْ نحكي على حدث الموسم بالطّبيعة السّياسي موش الرّياضي وكيف ما يقولو تمخّض الجبل -بعد طول انتظار- فولد فأرا... بعد شدّ وجذب وواحد يندّد ولاخرْ يشْجب وثالث يحْلف بالأيْمانات الكلّ اللّي هو خاطيه والمعْبر موش متاعو وموش مسؤول عليه ورابع مازال كيفْ فاق مالحريم والسكرة متاعو -حاشاكم- قالّك علاش مانعملوش قمّة خليجية في عوض قمّة عربية! وأخيرا تلمّوا بعض من أسود العرب، فئران أمريكا وكالعادة النتيجة هزيلة "نندّد ونشجب وندعو للسّلام... والسّلام على من اتبع الهدى"... دون إشارة بالطّبيعة باشكون يندّد وفي آشْكون يشجب وفي آشْكون يدعو للسّلام... كيفاه؟ هو يجي منو واحد يسترجل مرّة في حياتو ويقول مْريرة في الفال كليمة حق عالأقل ولادو نهار آخر وأحفادو يلقاو باش يتفكروه يا ديني (ولاّ قول هو نورمال خاطرْ وْلادو باش يشدّو بلاصتو وصنعة بوك لايْعايْروك!). هاذي ذكرتْني في النُكتة متاع الفار اللّي لأوّل مرّة تْجيه الشّجاعة، دخل للمجلس متاع الحيوانات اللي قاعدين في حضرة الصْيد وما أدراك، ذيوبة وثعالب وضباع وغيرها... عاد السّي الفار متنرفز دوّر عينيه في الجماعة القاعدين وسبّهم بالمقلوب حاشاكم... يتلفّت يلْقى القطّوس يُخْزرْلو كمّل قال "حاشى الرّجال..."! معناها الشيء اللّي يعملوا فيه عِربان آخر زْمان هو من هذا القبيل لا أكثر ولا أقلّ... ثم آنا مُعترْضة بشدّة على كلمة قمّة! قول قعدة متاع قطعية، لمّة متاع سوكارجية ما يخمّموا كان بنصفهم اللوطاني حاشاكم، زردة متاع تطبيل وتهليل وتنوفيق آما عمرك ما تنجّم تقنعني اللي هي قمّة! تقول عليهم في البيان الختامي طلعولنا ب"قطع العلاقات وطرد كل السّفراء الغربيين وعلى راسهم الأمريكان والإسرائيليين والقيام بتفعيل اتفاقية الدّفاع العربي المشترك" وبدَاتْ عادْ جحافل الجيوش العربية -الورقيّة- في دقّ أوتاد خيامها على الجبهة وشُفنا دبليو بوش في آخر أيّامو يُرْعش مالخوف كالفار حاشاكم...
آما الشيء القوي برشة هو هاك مكبوب السّعد محمود عباس والشهير بأبو مازن! السّي السّيد، الشعب متاعو تحت النار والقنابل تْصبّ عليه كيف الشتاء وهُو يقوم يُقعد يقلّهم "مانجّمش نحضر خاطر عليّ ضغوط..." ويعطيك العاطي "الشعبوبة" النّهار بطولو وهي تسبّ في حماس قال آشنوة هي السبب في العدوان ويلزمها توقف الضرب وتخلّي "الحكومة الشرعية" تتفاوض! يا والله حكومة ويا والله تفاوض! توّة زعمة أشكون يستحقّ الدّعم بقطع النظر على الايديولوجيا متاعو، اللّي يحارب بكل ما يملك للدفاع عن القضية متاعو ولا مريونات حططْتو أمريكا كيف مسمار جحا يأتمر بأوامرها. أيّ سيدي، تفرّجو في كلمة رئيس الوزراء القطري وشوفو الدُمّار والدّاء اللّي ما عندوش عقّار... متاع جماعة الطّابور وأذناب الطابور. (تحميل النسخة الاحتياطية هنا)
رئيس الوزراء القطري يخبر الصحفيين عن سبب عدم حضور الرئيس الفلسطيني محمود عباس ابو مازن أشغال قمة غزة الطارئة التي التأمت أخيرا بالدوحة (عن ايلاف).في المقابل، شوفو واحد بريطاني تولد وعاش حياتو كاملة في الغرب وما عندو حتى علاقة بفلسطين اشنوة يقول (تحميل النسخة الاحتياطية هنا).
في هذا الشريط، يفسّر جورج غالوي لماذا يُناصر قضيّة فلسطين. ويتكلّم على ظلم وجرائم إسرائيل ويعترف بدور بريطانيا في مؤامرة "دولة إسرائيل". يُذكّر كذلك بدور الحكومات العربيّة الفاسدة في تلك المؤامرة. كما ينقد عمل الحكومات الغربيّة على عدم تطبيق القوانين الدوليّة ضدّ إسرائيل (الدولة النوويّة بطريقة غير شرعية فيما تُهدّد إيران بالقصف لمجرّد تفكيرها في ذلك). ويتساءل أين العدالة إذن؟ ويدعو كل الناس إلى مقاطعة البضائع الإسرائيلية ليس فقط لأنّ إسرائيل دولة مغتصبة لأرض ليست أرضها وموارد ليست مواردها ولكنّها أيضا اغتصبت حياة الفلسطينيين!فهل لديكم يا جماعة الطابور ما تردّون به على السير جورج غالوي غير "إنه مجرّد هجوم .. تُدافع به دولة ديمقراطيّة على مواطنيها .. بالعلم ضدّ الغباء"؟ ألا يوجد تعليق لدى "الجْماعة اللّي يفهمولها"؟
في خبر قريتو على موقع العبرية (عفوا العربية) هنا، قالّك يا سيدي يا بن سيدي، 34 ألف إسرائيلي وقْعُوا على عريضة إحتجاج ضدّ مذيعة بالقناة الثانية الإسرائيلية بتهمة «التعاطف مع العدو». على ذمّة العربية بالطبيعة، قالّك أنو "إحدى أشهر المذيعات الإسرائيليات (...) يونيت ليفي، مقدّمة نشرة الثامنة مساء في القناة الثانية الإسرائيلية، وفي اليوم الثالث للحرب على غزة، قالت في نهاية النشرة «من الصعب إقناع العالم بأن الحرب عادلة عندما يموت لدينا شخص واحد بينما يموت من الفلسطينيين أكثر من 350 شخصا»." لهذا وقع "اتهامها بأنّها «معادية للصهونية ومتعاطفة مع العدو» والدعوة لطردها من عملها." و قالّك زادة أنّو "المذيعة واجهت انتقادات أيضا داخل القناة الثانية نفسها؛ حيث اعتبر البعض أنها «تضعف الشعور القومي»، من خلال إجرائها مقابلات متعاطفة مع سكان غزة، سألتهم فيها عن الاصابات بين المدنيين هناك. وتضيف الوكالة [وكالة «ناشونال نيوز» الإسرائيلية] أن حملة الانتقادات المترافقة مع العريضة دفعت المذيعة ليفي لمزيد من «رودو الفعل العاطفية» تجاه غزة، وذلك عندما أنهت نشرة الثامنة مساء يوم 6 يناير/ كانون الثاني بذرف دموعها." فيما فسّر بعض الإسرائيليين موقفها بسبب "أنها امرأة"! بالطبيعة هالموقف، اللي يعبّر على ازدراء واضح للمرأة (وهذا موش غريب على جماعة التلمود)، موش معقول في دولة يقولو عليها جماعة الطّابور "ديمقراطية". آما اللّي يهمّني أكثر هو ملاحظة أنّو نكاباتنا ومآسينا وُصْلت ذرفت دموع "أعدائنا" في الوقت اللّي احنا مازلنا نتناقشو "اللّي يموت في غزّة شهيد ولاّ قتيل!" حاصيلو دُمّار أزرق متاع شعبوبة كحلة!
المذيعة يونيت ليفي
المذيعة يونيت ليفيفي إطار الأخبار المتفرّقة، قالت ايلاف (هنا) أنّو فتاة أمريكية وضعت مزاد علني على الانترنيت لبيع عذريتها باعتبارها "عملة نادرة" في سنها (22 سنة) وقالّك تلقّات أكثر من عشرة ألاف عرض شراء أغلاهم قيمتوا خمسة ملايين دولار. لحقيقة اللي شدّني في الخبر هو تعليق أحد القرّاء اللي يقول فيه ما معناه "تتسمّى سلّكتها بالقدا بخمسة ملايين دولار. احنا الحكّام متاعنا باعوا عذريتهم وشرفهم وشعوبهم إلخ... لأمريكا وإسرائيل بمبلغ أقل من ذلك بكثير!" وتقولو الشّعب العربي جاهل ومايفهمْش وغبّي... ظاهرلي لازمْ تعاودوا حساباتكم يا "طابوريست"! هههه
من جهة أخرى، استغل واحد معتوه (هنا) الفرصة باش يبيض فتوى جديدة كيف وجهو الأغبر يقول فيها "فالأنثى - والكلام لمفتي السعودية- إذا تجاوزت العاشرة من العمر أوالـ 12 فهي قابلة للزواج، ومن يعتقد أنها صغيرة فقد أخطأ وظلمها. وعلى رغم أن رد المفتي كان على طلب لإحدى الحاضرات بتوجيه تجاه من يزوجون القاصرات من دون رضاهن، إلا أنه اعتبر أن من ينادون بأن المرأة يجب أن تكمل الـ 25 عاماً لتتزوج، «فقد سلكوا مسلكاً سيئاً». وتابع: «أمهاتنا ومن قبلهن جداتنا تزوجن وأعمارهن لم تتجاوز الـ 12، لكن التربية الصالحة الجيدة تجعل المرأة تأتي من بيت أهلها وهي في هذا السن، قادرة على القيام بواجباتها الزوجية»."
ياخي لو فرضنا جدلا صحّة الفتوى متاعك، ياخي وْفات مشاكل العرب والمسلمين حتى لين لقينا الوقت باش اناقشو "السّن السفلى لزواج المرأة". ياخي انتصرنا في كل حروبنا ووصل بينا العلم متاعنا للمرّيخ وجامعاتنا شادّين الأمريكان عليها الصفّ يحبّو يقراوْ فيها والمواطن العربي ولاّ يرمي في الفلوس من الشباك ومُترفّه للحدّ اللّي ماليبو والكراييب والبهاماس ولاّت مقاطعات تابعتنا؟ ياخي بنت ال25 لقات خدمة تجيب منها فلوس باش تعرّس هي والمغبون متاعها حتى لين تحكي على زواج بنت العشرة السنين. حاصيلو قدّاش عندى رغبة باش نعطيك كفوف ملاح على حناكك لمطبّقين فمّاشي ما "الفو كونتاكت" اللّي في مخّك يتصلّح!
والسّلام...
ياخي لو فرضنا جدلا صحّة الفتوى متاعك، ياخي وْفات مشاكل العرب والمسلمين حتى لين لقينا الوقت باش اناقشو "السّن السفلى لزواج المرأة". ياخي انتصرنا في كل حروبنا ووصل بينا العلم متاعنا للمرّيخ وجامعاتنا شادّين الأمريكان عليها الصفّ يحبّو يقراوْ فيها والمواطن العربي ولاّ يرمي في الفلوس من الشباك ومُترفّه للحدّ اللّي ماليبو والكراييب والبهاماس ولاّت مقاطعات تابعتنا؟ ياخي بنت ال25 لقات خدمة تجيب منها فلوس باش تعرّس هي والمغبون متاعها حتى لين تحكي على زواج بنت العشرة السنين. حاصيلو قدّاش عندى رغبة باش نعطيك كفوف ملاح على حناكك لمطبّقين فمّاشي ما "الفو كونتاكت" اللّي في مخّك يتصلّح!
والسّلام...
ماسمعتش بحكاية يونيت ليفي هذية.. شكرا على الاضافة
طارق:
عالسّلامة أخ طارق، لحقيقة حكاية يونيت ليفي ما قريتها كان في موقع العربية (اللّي شخصيا نعتبروا من جملة الصحافة الصفراء) وبخصوص صدقية الخبر الله أعلم. شكرا لمرورك.